தக்கென பிழைக்கும் எண்ணங்களால் சுயங்கள் உருவாகும் விதம்

ஓய்வுக்காக காத்திருக்கும் வேளையிலும் 

முடிவெடுக்க வேண்டிய தருணங்களிலும் 

இச்சை செயல்களின் முற்பகுதியிலும் 

என்னுள் தோன்றும் ஆயிரமாயிரம் எண்ணங்கள் 

புற்றீசல் போல் வெளிவந்து 

என்னை உள்ளிழுத்துச் செல்லும்

அவை பசிக்காக நானா 

என் பசிக்காக அவைகளா 

என சிந்திக்கும் வேளையில் 

அவைகள் ஓங்கும் சக்தி ஒடுங்கும் சக்தி
என ஈரணியில் பிரிந்து போரிட துவங்க 

வேங்கைகளின் வேட்டைச் சண்டையை 

வேடிக்கை பார்க்கும் குற்றுயிர் மானாய் 

போரை கவனிக்கையில் பல நேரங்களில் 

ஓங்கும் சக்தி ஒடுங்கியும்
ஒடுங்கும் சக்தி ஓங்கியும் செயல்பட
பெரும்பாலும் ஓங்கும் சக்தியின் வீரர்கள் 

சோர்ந்தும் போரிட வலிமையின்றியும் 

எந்நேரத்திலும் போரிலிருந்து பின்வாங்க 

ஆயத்தமாகவும் இருக்கவே 

ஒடுங்கும் சக்தியே பலமுறை வென்று
தன் முடிவை செயல்படுத்தும்

இது போன்ற போர்களின் முடிவுகளே
என் சுயத்தை வரையறை செய்யும் காரணிகளாகி
நாளடைவில் ஓங்கும் சக்தியே சிந்தனையாய்
ஒடுங்கும் சக்தியே செயலாய் மாறி
செயலென்னும் வெந்நீரில் சிந்தனை மீன் நீந்தும்
போர்களும் தக்கென தழைத்தலுமே மாறிலிகளாய்...

இருளில் உயிர் பெறும் மலைகளும், வெளிப்படும் சுயங்களும்

இருகை கொண்டு பிழிந்தால்

இருள் சிதறும் அளவிலான
காரிருளில் மூழ்கி 

ஊறும் மலையில்,
கிழிபட்டு பொங்கும் அருவியில்
நீரருந்தும் வல்லூறுகளின் மத்தியில்

இடையனின் மந்தையிலிருந்து 
தவறிய ஆடு
இருளைப் போர்த்திக்கொண்டு 
புதரில் பதுங்க

பசியின் மடியில் தவழும் பாம்பு

இருளின் கருமையை உறிஞ்சி

மயங்கிக்கொண்டிருக்கும் வேளையில்

மேகத்தை இருளில் கரைத்து

மலையில் ஊற்றுகையில்
ஆங்காங்கே தேங்கிவிட்ட 
மேக திட்டுக்களாய் 

உறங்கிக்கொண்டிருக்கும் 
யானைகளின் இடையில்

தொலைந்த ஆட்டை தேடும் சிறுவன்

சுவாசிக்கும் காற்றும் இருளாய் மாறி

அவனுள் சென்று தன்னையும்

இருளாய் மாற்றுவது போல் உணர 

தேடு பொருளை மறந்து

கடந்து வந்த வழியையும்

இரவிடம் பறிகொடுத்து 

இருளில் எரிகல்லாய் மறைய

தொலைந்த ஆடு
தவறிய சிறுவன்
அவர்கள் மறைந்த சுவடுகளை
தேடிக்கொண்டிருக்கும் ஓநாய்
என

பல ரகசியங்களை
தன்னில் ஒளித்து
வைத்துக்கொண்டிருக்கும் கர்வத்தில்
இரவு உதிர்க்கும் மர்ம சிரிப்பில்

அதிரும் மரங்கள்,..

காற்றை கைவசப்படுத்தி மிரட்டும்

'ஓ' வென்ற சத்தத்தில்

அடங்கிப்போகும்

அனைத்து உயிர்களும்...